लिङ्गाष्टकम

ब्रह्म-मुरारि-सुरार्चित-लिङ्गं,

निर्मल-भासित-शोभित- लिङ्गम्।

जन्मज-दुःख-विनाशक-लिङ्गं,

तत्प्रणमामि सदाशिवलिङ्गम् ।। 1।।

देवमुनि-प्रवरार्चित-लिङ्गं,

कामदहं करुणाकर लिङ्गम्।

रावणदर्प-विनाशन-लिङ्गं,

तत्प्रणमामि सदाशिवलिङ्गम् ।।2।।

सर्वसुगन्धि-सुलेपितलिङ्गं,

बुद्धिविवर्धन-कारण लिङ्गम् ।

सिद्ध-सुरा-ऽ-सुर-वन्दितलिङ्गं,

तत्प्रणमामि सदाशिवलिङ्गम् ।।3।।

कनक-महामणि-भूषितलिङ्गं,

फणिपति-वेष्टित-शोभित लिङ्गम् ।

दक्षसुयज्ञ-विनाशकलिङ्गं,

तत्प्रणमामि सदाशिवलिङ्गम् ।।4।।

कुङ्कुम-चन्दन-लेपितलिङ्गं,

पङ्कजहार-सुशोभित लिङ्गम् ।

सञ्चित-पाप-विनाशनलिङ्गं,

तत्प्रणमामि सदाशिवलिङ्गम् ।।5।।

देवगणार्चित-सेवित लिङ्गं,

भावैर्भक्तिभिरेव च लिङ्गं।

दिनकरकोटि-प्रभाकर लिङ्गं,

तत्प्रणमामि सदाशिवलिङ्गम् ।।6।।

अष्टदलोपरि-वेष्टित लिङ्गं,

सर्वसमुद्भव-कारणलिङ्गम्।

अष्टदरिद्र-विनाशितलिङ्गं,

तत्प्रणमामि सदाशिवलिङ्गम् ।।7।।

सुरगुरु-सुरवर-पूजित लिङ्गं,

सुरवनपुष्प-सदार्चित लिङ्गम्।

परात्परं परमात्मक लिङ्गं,

तत्प्रणमामि सदाशिवलिङ्गम् ।।8।।

लिङ्गाष्टकमिदं पुण्यं यः पठेच्धिव सन्निधौ।

शिवलोकमवाप्नोति शिवेन सह मोदते ।।9।।

इति लिङ्गाष्टकम समाप्तम्।

More Articles...